تفاصيل صادمة لواقعة مؤسفة في القسم الثاني.. تفاصيل

كشف أحمد عبد الفضيل لاعب فريق القزازين أحد أندية القسم الثاني تفاصيل صادمة حول الضغوط النفسية التي تعرض لها بعد تخلي مسؤلي النادي عنه عقب اصابته بقطع في الرباط الصليبي.

قال أحمد عبد الفضيل عبر الصفحة الشخصية بموقع التواصل الاجتماعي فيسبوك:
بسم الله الرحمن الرحيم
أنا أحمد عبدالفضيل لاعب القزازين
أولا أنا مكنتش حابب اتكلم ف الموضوع بتاعي لكن مبقاش ينفع خلاص اني اسكت ولازم اتكلم واحكي كل حاجه حصلت معايا بعد اللي حصل ل أحمد رفعت ربنا يرحمه ويغفرله .
تابع: أنا محطوط في موقف صعب جدا ونفسيا مش احسن حاجه .
أضاف: أنا اتصابت في ماتش المنصوره وجالي قطع ف الرباط الصليبي واول ما روحت البيت دكتور النادي كلمني قالي اعمل اشاعه عندك ولما تيجي هجبلك الفلوس من الحاج علي القزاز رئيس مجلس الاداراه.
استطرد: روحت عملت اشاعه على حسابي والتشخيص طلع ان عندي قطع في الرباط الصليبي والغضروف.
واصل: كابتن سامح العربي كلمني بعدها والحقيقه الراجل ده دايما على اتصال بيا وبيطمن عليا
المهم كلمني وقالي روح لدكتور ايمن إبراهيم اكشف عنده وشوف هيقولك ايه .
وزاد: سمعت الكلام وروحت لدكتور ايمن إبراهيم وكشفت عنده وقالي ان عندي قطع ف الصليبي والغضروف وهنحتاج عمليه وكتبلي تقرير بالتكاليف.
أكمل: بعت التكاليف دي طبعا للدكتور عمرو وللكابتن سامح العربي وهما قعدوا يتواصلوا مع الحاج علي القزاز عشان اعمل العمليه.
أتم : قبل ماتش صيد المحله كلمني الأستاذ حسين القزاز (ابو سيف) وقالي هنعملك العمليه متقلقش وان شاء الله ربنا يكرمنا بكرا ونصعد وادعيلنا وان شاء الله خير .
اردف: محصلش نصيب والمنصوره هو اللي صعد بفارق هدفين
ومن بعدها اكلم دكتور عمرو يوميا عشان اعمل العمليه كان رده انه مش عارف يوصل لرئيس النادي
والكابتن سامح برضو قالي انه مش عارف يوصل لرئيس النادي
أنا اتصلت برئيس النادي وبعتله ع الواتساب رسايل كتير جدا وشبه يوميا مكنش بيرد عليا وبيتجاهل الرد تماماً .
أسهب: تواصلت مع كابتن عبدالرحمن المعد البدني للفريق بعد شهر من الإصابة قالي هكلم الحاج علي والاداره وان شاء الله خير .
وقال أيضا: بعد 3 ايام جالي الرد ان النادي مش هيعمل العمليه ومش هيتكلف ب اي حاجه اعملها انت على حسابك وهتاخد الاستغناء
قومت نزلت ع الواتساب ستوري والوكيل بتاعي محمود حموده كلم صفحات تخص القسم الثاني
طبعا بشكرهم جدا انهم استجابوا ونزلو بوست يتكلمو فيه عن مشكلتي مع النادي استاذ طارق شاكر ومحمد الشامي واستاذ رضا السنباطي وغيرهم مش عايز انسى حد.
وقال: اول ما البوست نزل تكفل رجل أعمال من القاهرة ليس له علاقه بالنادي ولا من قريب ولا من بعيد .. مستر محمد عادل رئيس مجلس إدارة شركة الباسل جروب للعقارات ربنا يباركله ويجازيه كل خير
واستكمل: ملحوظه مستر محمد معندوش فيس بوك عرف الخبر عن طريق لاعب المنصوره محمد الصغير ومترردش لحظه ف نفس اليوم قالي تعالى خد الشيك المهم ان الحمدلله عملت العمليه وحاليا أنا في مرحلة التأهيل ولحد الآن النادي بيتجاهل الرد عليا ومش بس كده .
واختتم حديثه قائلا: وصلي كلام انهم هيبطلوني كوره وهيخلوني العب درجه رابعه هل ده يرضي ربنا ؟ هو اذى الإنسان سهل كده ؟
هي حياة البني ادم ونفسيته رخيصه للدرجه دي؟ عند الله تجتمع الخصوم .. اقسم بالله ده اللي حصل معايا بالحرف ومعايا كل حاجه بالدليل لو حد عايز يواجهني أنا مستعد .. إلى الله المشتكي.