شوبير يفتح النار على بيزيرا بسبب الزمالك.. تفاصيل

فتح الإعلامي أحمد شوبير النار على البرازيلي خوان بيزيرا، لاعب الفريق الأول لكرة القدم بنادي الزمالك، بسبب رفضه العودة إلى القاهرة وتمسكه بالرحيل عن القلعة البيضاء.

وقال شوبير في برنامجه الإذاعي: خوان بيزيرا عمل بث مباشر امبارح وبقى حديث الصباح والمساء، اللي محدش كان يعرفه قبل ما ينضم للزمالك، فجأة جه الزمالك وبقى ملء السمع والبصر.

وتابع: ناس قالت إنه أحسن لاعب في مصر، وهو فعلا لاعب كويس لكن اللي بيحصل من اللاعب ده غير مقبول.

وأضاف: عمل بث مباشر لمدة 30 دقيقة، وشوفت أكتر من 7 آلاف واحد من جماهير الزمالك بيقولوا له: ارجع يا بيزيرا، إحنا في انتظارك، ارجع يا بيزيرا، لكنه رد عليهم وقال إنه مش راجع، وأنا بقول لجماهير الزمالك: متعبروش بيزيرا.

واختتم: الزمالك فضله على بيزيرا من ساسه لراسه، ومحدش كان يعرفه في المنطقة قبل الزمالك، لكن النادي هو اللي ساهم في ظهوره وشهرته بالشكل ده، وبالتالي لازم يكون فيه تقدير لدور الزمالك في مسيرته.