حارس الأهلي يعلن انتقاله إلى نادِ أوروبي

نشر حمزة علاء، حارس مرمى الأهلي السابق، صورة عبر حسابه الرسمي على "إنستجرام"، أثناء تواجده على متن الطائرة، إيذانًا ببدء رحلته الاحترافية الجديدة وتحديد وجهته المقبلة بعد رحيله عن القلعة الحمراء.

وكان حمزة قد ودّع النادي الأهلي برسالة مؤثرة وجّهها عبر "إنستجرام"، عبّر فيها عن امتنانه للنادي وجماهيره، وقال:
"يمكن الكلام اتأخر، وعلشان كده حابب أعتذر.. من حوالي شهر خدت أصعب قرار في حياتي، وهو إني أسيب بيتي بعد 16 سنة قضيتهم في الأهلي".

وأضاف: "قرار الرحيل ما كانش سهل، لكن كان لازم أفكر في مستقبلي.. الفرصة مجتش زي ما كنت أتمنى، بس دايمًا بقول إن كل حاجة بتحصل بيكون فيها خير، ورب الخير لا يأتي إلا بالخير".

ووجه رسالة خاصة لجمهور الأهلي: "محبتكم وشكركم عمرهم ما كانوا مرتبطين بعدد الدقايق اللي لعبتها.. دايمًا كنتوا السند في كل لحظة وكل بطولة، وحسيت معاكم إني أحسن حارس في العالم لما لعبت في أفريقيا والأولمبياد.. كل اللي بطلبه تفضلوا فاكرين إني كنت واحد منكم وابن من أبناء النادي".

وتابع: "شكرًا لإدارة النادي الأهلي على كل لحظة حسيت فيها إني جزء من الكيان.. وزمايلي، أنتم إخواتي وعيلتي اللي مش هنسى أبدًا الأيام الحلوة اللي جمعتنا، وبتمنا لكم كل النجاح".

ووجه كلمة تقدير للمدربين والعاملين بالنادي قائلًا: "لكل مدرب اشتغلت معاه.. شكرًا من قلبي على كل لحظة دعمتوني فيها أو علمتوني فيها حاجة، ولكل عامل اشتغلت معاه.. أنتم غاليين عليا قوي".

واختتم رسالته: "هفضل دايمًا مشجع من قلب التالتة شمال، ويا رب أكون قد ثقتكم في خطوتي الجاية، وأشوفكم دايمًا بخير.. ابنكم، حمزة علاء".