"الهجوم عرض مستمر ".. شوبير يفتح النار على موسيماني مٌجدداً

واصل الإعلامي أحمد شوبير نجم النادي الأهلي ومنتخب مصر السابق انتقاده اللاذع لبيتسو موسيماني المدير الفني الجنوب أفريقي للفريق الأول لكرة القدم بالقلعة الحمراء بسبب منح لاعبيه فترة كبيرة من الراحة السلبية.

وقال شوبير في تصريحات إذاعية صباح اليوم الأحد "مش هغير كلامى ومش هبطل أقول اللى بيحصل فى الأهلى غلط ومش مظبوط، ودى الحاجة الوحيدة اللى مخليانى قلقان رغم أن فرص صعود الأهلى لربع نهائى دوري أبطال أفريقيا 99.9%".

وتابع "إزاى الأهلى ياخد راحة 8 أيام، فى لاعيبة كتير مش بتلعب ومعندهاش إجهاد وكان لازم يرجعوا للتمرين بدرى، يعنى إيه الفريق يرجع يوم 27 مارس وعنده مباراة يوم 2 أبريل، بجد إزاى حد يفهمنى ليه الأهلى النادى الوحيد فى مصر اللى مبيلعبش مباريات ودية".

وأضاف "الناس عملت برامج ترد عليا وانا بردو مصمم ومش هغير كلامى وأعتقد أنا بفهم شوية فى الكورة وكنت بلعب زمان لو نسيتوا يعنى ، وحد بيقولى أصل دى مدرسة جديدة ياكابتن فى التدريب، والله بحكم شغلى بتابع كل الدوريات ومسمعتش عن المدرسة الجديدة فى التدريب دى غير فى الأهلى".

وواصل" فيها ايه يعنى لما يرجعوا بدرى شوية ويتعمل برامج لتجهيز اللاعبين بتوع الدكة ونعمل مباريات ودية نشوفهم كويس ، أعتقد مطلب مشروع".