بطريقة كوميدية..أسطورة الزمالك يفضح ميدو

نشر الإعلامي أحمد حسام "ميدو"، منشورا جديدا عبر الصفحة الرسمية لبرنامجه "أوضة اللبس مع ميدو" المذاع عبر قناة النهار علي موقع التواصل الاجتماعي فيسبوك.

وحكى ميدو عن أحد المواقف الكوميدية التي تعرض لها في الفترة التي كان يقود فيها نادي الزمالك فنياً حيث قال:"أثناء تدريبي للزمالك في إحدي المباريات الافريقية روحنا نلاعب فريق "ناكانا" الزامبي، وكان كالوشا وزير الرياضة هناك، فالراجل كان حاجب جميع مباريات الفريق عن الإعلام قبل تلك المباراة، فروحنا وقتها علي أساس إننا هنلاعب فريق مجهول منعرفش عنه أي حاجة".

وتابع:"بالصدفة قابلنا مدرب مصري قالي انا معايا شريط لآخر مباراة للفريق ده، ممكن اديهولك بس بشرط متجيبش سيرتي في أي حاجة لإني هروح في داهية، وبالفعل في ليلتها جابلي الشريط ودخلته من الشباك عشان محدش يشوفه، وقعدت اتفرج ع المباراة وادرس الفريق بعدين أديته الشريط ومشي في الخفاء".

وأضاف:"بعدها قعدت أشرح للاعيبين طريقة لعبهم ونقط القوة والضعف وخلافه، فلقيت هشام يكن بيقولي "انت عرفت كل ده منين؟!".

فأجبه ميدو:" مدرب مصري هنا جابلي شريط لآخر مباراة ليهم، بس الكلام ده سر اوعي تقوله لأي حد، الراجل موصيني إنه هيروح في داهية لو الكلام ده طلع، قالي تمام والدنيا عدت."

واختتم قائلاً:"بعدها علي طول لقيت تصريحات منقولة علي لسان الكابتن هشام يكن في كل المواقع المصرية إنه بيوجه الشكر للمدرب المصري اللي ساعدنا في التعرف علي الفريق الزامبي ".