رضا عبد العال: راضي على أداء لاعبي طنطا رغم ثلاثية الزمالك

أعرب المدير الفني لفريق طنطا، رضا عبدالعال عن رضاه التام عن آداء لاعبيه رغم الخسارة أمام الزمالك بنتيجة 3-1، اليوم الثلاثاء، بالجولة الـ29 من بطولة الدوري المصري الممتاز.

وقال رضا عبدالعال خلال المؤتمر الصحفي الذي أعقب اللقاء: الحمدلله.. أشكر اللاعبين على الآداء الكبير الذي قدموه اليوم بغض النظر عن النتيجة، الزمالك انه يكسب طنطا بالشكل ده كان بفضل مجهود كبير مني، خاصة وانا عندي غيابات فرقت كتير في منطقة الهجوم، وفرقت جدا في الأداء.

وأضاف مدرب طنطا: كنت هلعب بطريقة تانيه يادوب ٢٥ دقيقة لاقيت اللاعيبة وقعت مني معملوش استشفاء، انا النهارده معملتش حاجة انا بتعامل مع اللاعيبة نفسي، انا بعذر اللاعيبة لأنهم مش قادرين يشيوا رجليهم من الأرض.

وتابع: في اندية اتظلم بعد الكورونا، زي طنطا لان كان عندها اكتر من ١٥ حالة، وفي ٤ لاعيبة كان عندهم كورونا من كام يوم ونتيجة المسحة ظهرت النهاردة لو كان عندهم حاجة انا كنت عملت ايه بقى؟!

وأردف "عبدالعال": طنطا والإسماعيلي والمصري اكتر لاعيبة اتظلموا.

وعن لقطته الطريفة بارتداء الكمامة على وجهه: انا كنت حاطط الكمامة كدة لإني كنت خايف لايكون اللي جنبي عنده كورونا.

وأكمل: لاعبتي عندها إرهاق بدني، ولعبت بنفس طريقة الفريق المعتادة لإني ملحقتش انفذ التكتيك الخاص بي، وكنت محدد لاعيبة معينه تمسك لاعيبة الزمالك ولكن التعب هو اللي فرق الشوط التاني، كمان أنا اشتغلت على جانب أعرض نفسك واكسب عشان الدنيا تمشي، ولو اتكلمت عن التحكيم هتوقف.

كما رد "عبالعال" بسخرية على سؤال لماذا تخاطر باسمك بتدريب طنطا في هذا الوقت الصعب، قائلًا: هو انا كنت بدري منتخب مصر؟!، الناس هتلاقي طنطا بشكل تاني خالص وقت ما لاعيبتي عددها يكمل، ومفيش مخاطرة ولا حاجة.

وأتم: انا قولت لما كنت موجود في الاستديو التحليلي إن طنطا هيهبط، انا بشكر كل جماهير مصر السوشيال ميديا كلها كانت بتتكلم على رضا عبد العال، ولو كارتيرون كان موجود كنت كسبته والله، اهو شال ٦ امبارح مع التعاون ومش هيكمل ٤ ايام هناك لاعبي الزمالك هي التي كانت تقوم بكل شيء.