شاهد.. الميرغني يدخل في مشادة كلامية مع مالك وادي دجلة

دخل أحمد الميرغني لاعب الزمالك ووادي دجلة السابق في مشادة كلامية مع المهندس ماجد سامي مالك أندية وادي دجلة وذلك على خلفية التصريحات التي يصدرها ماجد سامي بشأن رفضه عودة الدوري الممتاز مرة أخرى.

ونشر الميرغني عبر حسابه الشخصي على فيس بوك " بقالي فترة متابع اللي بيتقال علي رجوع الدوري وكل شوية بيجي قدامي كلام الاستاذ ماجد سامي مالك وادي دجلة علي رفضه التام رجوع الدوري خوفًا علي حياه وصحة اللاعبين والقائمين علي المنظومة الكروية ( انا علي فكرة معه في رأيه أنه ميرجعش دلوقتي حفاظًا علي حياه الناس )".

وأضاف لاعب دجلة السابق " بس هل دي نيته فعلبا ولا هو عاوز الدوري يتلغي عشان دجلة ميهبطش".

وواصل حديثه " لو انت خايف علي حياه الناس كنت خفت علي مستقبلي لما كنت بلعب في وادي دجلة ووقفت معايا خصوصًا ان انا ساعتها كنت لاعب عندك في الفريق حتى لو شايفني قلت كلام مكنش ينفع يتقال كان ممكن الف طريقة غير اللي انت عملته معايا انك تستغني عني بالصورة اللي كل الناس شافتها وتكون مساهم في ضياع مستقبلي في الكورة".

وتابع " وقال ايه لما انا رحت جولدي انت قولت الحمد لله اني رحت نادي !!! انت مصدق نفسك ؟؟ لاعب كان بيلعب دوري ممتاز وانت مبسوط انه راح درجة رابعه وشايف كدة انا تمام !! ؟؟".

واستطرد " مش كدة وبس لا كمان كنت شاري لما كنت لاعب في وادي دجلة فيلا عندهم في كمبوند اسمه بيراميدز واك وطبعًا بعد المشكلة بفترة مكنتش بقدر اسدد المبالغ اللي عليا واترفع عليا قضية والمهم ربنا كرمني وبعتها ودفعت الفلوس اللي عليا والغرامات وكل حاجة راح سايب القضية شغالة ومقالوش اني دفعت من بدري".

وأكمل " فجأة ألاقي محضر بيحجز على الشقة ( بعد ما سددت بسنتين ) وبيقولي عليك غرامة ١١٣ الف جنيه بدفع فيهم من السنة اللي فاتت".

وأتم " فلو سمحت متقولش إنك خايف أن الدوري يرجع علشان الناس".

ورد ماجد سامي على الميرغني قائلا " أنت كداب أنت عقدك كان فاضل عليه شهرين واحنا مجددنالكش لمستواك مش للكلام اللي انت قولته احنا إديناك أجازة شهرين عشان الكلام اللي قولته اما انت كنت ماشي ماشي متكذبش الكذبة وبعدين تصدقها أنا فاكر قصتك كويس".