باسم مرسي يكشف كواليس عودته للزمالك

حرص باسم مرسي مهاجم فريق الزمالك على الكشف عن كل التفاصيل الخاصة بعودته من جديد إلى القلعة البيضاء وعدم بقائه مع فريق سموحة وفسخ عقد الإعارة.

وكتب اللاعب عبر حسابه على "تويتر":تلقيت اليوم اتصال من مسئول ف نادى الزمالك يطالبنى بالرجوع، قالى بالنص " عندى ليك مفاجأة، الزمالك عايزك ترجع وتروح نادى تانى بدل سموحة، احنا الاخرنا البطاقة الدولية عشان لو كنت لعبت الماتش مكناش هنعرف نرجعك بسبب موضوع معين بقيت انا طرف فيه بدون ارادتى، دلوقتى قدامى اختيار من اتنين الاول انى العب ف الزمالك والمدرب مش عايزنى بالف جنيه ف ست شهور....".

وتابع "الاختيار التانى انى انتقل لفريق ترتيبه الاخير ف الدورى. هل انا بعد ما لعبت اربع مواسم ف الزمالك، حصلنا فيهم على ٥ بطولات واحرزت ٥٣ جول، دة يكون مصيرى من مسئولين نادى الزمالك ؟!،قبل كدة انا مكنتش بطلع اتكلم، بس الموضوع يوصل ان يتقال ان التاخير بسببى فى موضوع البطاقة الدولية وتشويه سمعتى ان دة بسبب خلاف مادى بينى وبين النادى اليونانى ف دة مش صحيح.".

وأضاف "انا عقدى اتفسخ رسمى من الاتحاد اليونانى، لو مكنش اتفسخ رسمى مكنش يحقلى انى اتمرن مع نادى سموحة، انا فى وقت اقامتى كاملة ف اليونان، حصلت على ٥ الاف يورو فقط واتنازلت عن جميع مستحقاتى للزمالك وجددت سنتين اتنازلت فيهم عن ٤ مليون جنيه عشان يوافقوا على احترافى،و عند انتقالى اعارة لسموحة جددت سنة كمان على بياض، انا هرجع نادى الزمالك مش لو بالف جنيه لو ببلاش لان شرف ليا انى العب ف نادى الزمالك".

وواصل "مكنتش حابب انى اتكلم رغم اتصال عدة برامج بيا من وقت وصولى للقاهرة لتوضيح عدة امور بمقابل مادى بس انا كنت برفض، وأكمل "انا حاليًا بعد ما استقريت فى الاسكندرية ونقلت اسرتى واغراضى واستأجرت محل سكن، تم ابلاغى انى لازم الغى كل دة وارجع حالًا يا اقعد ست شهور ف البيت، يارب الناس الكانت بتتهمنى انى مقصر طول الوقت وبعمل مشاكل تكون الصورة واضحة لهم، انا طول الوقت بتحط ف مشاكل انا مش سبب فيها. اسف على التطويل بس كان لازم التوضيح".